Սուրեն Կարայանը հանդիպել է Իրանի դեսպանի հետ

ՀՀ տնտեսական զարգացման և ներդրումների նախարար Սուրեն Կարայանը նոյեմբերի 17-ին հանդիպում է ունեցել Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան Սեյեդ Քազեմ Սաջադիի հետ` քննարկելու հայ-իրանական տնտեսական համագործակցության հեռանկարները:

Նախարար Կարայանն իր ներածական խոսքում նշել է, որ Իրանի Իսալամական Հանրապետությունը կարևոր տնտեսական գործընկեր է Հայաստանի համար, և հարկավոր է հստակ քայլեր ձեռնարկել երկու երկրների տնտեսական համագործակցությունն ավելի ակտիվացնելու համար: Նախարարն այս համատեքստում կարևորել է այս տարի Իրանում կայացած հայկական ապրանքների և ծառայությունների ցուցահանդեսը: Սուրեն Կարայանը հանդես է եկել համատեղ խմբի միջոցով ցուցահանդեսի շարունակակությունը ապահովելու առաջարկությամբ: Նախարարն առաջարկել է նաև քայլեր ձեռնարկել միջտարածաշրջանային (Հայաստան, Իրան, Վրաստան) զբոսաշրջությունը զարգացնելու ուղղությամբ:

Դեսպան Սեյեդ Քազեմ Սաջադին նախարարին է ներկայացրել այն բոլոր ոլորտները և հնարավորությունները, որոնք կնպաստեն երկու երկրների միջև տնտեսական համագործակցության խորացմանը: Դեսպանի խոսքով, Հայաստանը կարևոր առևտրային հանգույց է, որ կարող է կապել Իրանը Եվրասական տնտեսական միության անդամ մյուս երկրների հետ: Դեսպանը համագործակցության խթանման տեսանկյունից կարևորել է Իրանի և Հայաստանի միջև վիզային ռեժիմի չեղարկումը, օդային հաղորդակցության ակտիվացումը և Իրանում մեծ հայկական համայնքի գործոնը: Դեսպանն իր հերթին առաջարկել է զարկ տալ Հայաստանի և Իրանի միջև միջմարզային համագործակցությանը:

Նախարար Սուրեն Կարայանը շնորհակալություն է հայտնել Սեյեդ Քազեմ Սաջադիին արդյունավետ քննարկման համար` հույս հայտնելով, որ նման հանդիպումները կլինեն պարբերական:

Քննարկվել են հայ-իրանական տնտեսական համագործակցության խորացման հնարավորությունները

Քննարկվել են հայ-իրանական տնտեսական համագործակցության հեռանկարները

Նոյեմբերի 17-ին ՀՀ տնտեսական զարգացման և ներդրումների նախարարությունում հանդիպում է տեղի ունեցել Իրանի Իսլամական Հանրապետության Ֆինանսների և տնտեսական հարցերով փոխնախարար, մաքսային ծառայության ղեկավար Մասուդ Քարբասիանի գլխավորած պատվիրակության հետ: 

Նախարար Սուրեն Կարայանը, ողջունելով հյուրերին, նշել է, որ կան մի շարք հարցեր, որոնց լուծումը նոր հնարավորություններ կընձեռի` զարգացնելու Հայաստանի և Իրանի միջև տնտեսական համագործակցությունը: Նախարարը խոսել է ազատ տնտեսական գոտիների կարևորության մասին` նշելով, որ այս ուղղությամբ ակնկալում է միասնական ջանքերի ներդնում: Նախարարը կարևորել է անխափան տարանցիկ փոխադրումների համար ընդհանուր մոտեցումները և պարզեցված մաքսային ընթացակարգերը:

Մասուդ Քարբարսիանը նախարար Կարայանին տեղեկացրել է մաքսային սահմանին համագործակցության շուրջ ՀՀ ՊԵԿ նախագահի հետ ձեռքբերված համաձայնությունների մասին, որոնք կխթանեն երկու երկրների տնտեսական փոխգործակցությունը: Մասուդ Քարբասիանը նշել է, որ Հայաստանի անդամակցությունը Եվրասիական տնտեսական միությանը լուրջ հնարավորություններ է ստեղծում իրանական ապրանքների արտահանման համար, և այս առումով Հայաստանը կարևոր օղակ է: Մաքսային ծառայության ղեկավարը բարձր է գնահատել Իրան-ԵԱՏՄ բանակցություններում Հայաստանի պատվիրակության ջանքերը:

Ըստ Քարբարսիանի` երկու երկրների համար ներդրումների աճը առաջնահերթություն է, և փորձի փոխանակումը այս ոլորտում արդյունավետ կլինի Հայաստանի և Իրանի համար:

Նախարար Սուրեն Կարայանը շնորհահակալություն է հայտնել հանդիպման համար` հույս հայտնելով, որ նման հանդիպումները և համաձայնությունները կնպաստեն Հայաստանի և Իրանի տնտեսական զարգացմանը:

Հանդիպման ավարտին Սուրեն Կարայանը հյուրերին է ներկայացրել Armphone հայկական արտադրության հեռախոսը, որը, հյուրերի հավատսմամբ, կարող է հետաքրքրել իրանցի սպառողներին: