Ֆինանսների նախարարությունը շարունակում է կրճատումները

Կառավարության վաղվա նիստի օրակարգում ֆինանսների նախարարությունը ներառել է որոշում, որը բխում է վարչապետի հանձնարարականից՝ կրճատել ՊՈԱԿ-ները:

Այսպես` կլուծարվի ՀՀ ֆինանսների նախարարության «Գնագոյացման վերլուծական ինֆորմացիոն կենտրոն» ՊՈԱԿ-ը, կստեղծվի ֆինանսների նախարարության աշխատակազմի գների ուսումնասիրության և վերլուծության գործակալություն: Արդյունքում, պետական կառավարման մարմնին վերապահված գործառույթը կիրականացվի 15 հաստիքային միավորի հաշվին՝ 36-ի փոխարեն: ՊՈԱԿ-ի լուծարման արդյունքում ՀՀ պետական բյուջեի ծախսերը կնվազեն մոտ 50 մլն ՀՀ դրամով:

Կլուծարվի նաև «Էկոնոմիկա հանդես» փակ բաժնետիրական ընկերությունը: Հիմնավորման համաձայն, Էկոնոմիկա հանդես» ի հիմնական գործառույթը առցանց տարբերակով /armef.com կայքի միջոցով/ տնտեսական, գիտական և վերլուծական հրապարակումներ թողարկելն է:

Կայքը ներկայացնում է ՀՀ կառավարության՝ տնտեսությանն առնչվող որոշումները, օրենսդրական նախաձեռնությունները, հաստատած ծրագրերը, ռազմավարությունները, մեկնաբանում է դրանց բովանդակությունը, ինչպես նաև կայքը հանրությանը տրամադրում է տեղեկատվություն միջազգային կառույցների վերլուծությունների, համաշխարհային տնտեսության վերաբերյալ և մեկնաբանում միջազգային հեղինակավոր կազմակերպությունների վարկանիշային վերլուծությունները:

«Էկոնոմիկա հանդես» ՓԲԸ-ն գործառույթները իրականացնում է 12 հաստիքային միավորների միջոցով: «էկոնոմիկա հանդես» փակ բաժնետիրական ընկերության լուծարման արդյունքում` վերջինիս կողմից իրականացվող գործառույթները կիրականացվեն ՀՀ ֆինանսների նախարարության աշխատակազմի միջոցով