Ադրբեջանցի լրագրողը քաղաքական ապաստան է խնդրել Շվեյցարիայից

Ադրբեջանցի լրագրող Ռաուֆ Միրկադիրովը քաղաքական ապաստան է խնդրել Շվեյցարիայից։ Ավելի վաղ այնտեղ ապաստան էր ստացել նրա ընտանիքը, ինչպես հայտնում է հայտնում է BBC-ն, այս մասին տեղեկացրել է «Թուրան» գործակալությունը՝ հղում անելով լրագրողի փաստաբան Ֆուադ Ագաեւին։

Ռուսալեզու անկախ «Զերկալո» պարբերականի լրագրող Միրկադիրովը ձերբակալվել է 2014 թվականին Թուրքիայում, որտեղից արտաքսվել է Ադրբեջան։ Նրա ընտանիքը մնացել է Թուրքիայում, որից հետո քաղաքական ապաստան է ստացել Շվեյցարիայում։ 2015 թվականի դեկտեմբերին Միրկադիրովը 6 տարի ազատազրկման է ենթարկվել՝ պետական դավաճանության մեղադրանքով։ Մեղադրանքում նշվում է, որ լրագրողը աշխատել է  Հայաստանի հետախուզական ծառայությունների հետ։

Այս տարվա մարտ ամսին նրա դատավճիռը փոխվել է հնգամյա փորձաշրջանով՝ պայմանական ազատազրկմամբ։ Միրկադիրովը պնդում է, որ նա երբեք գործ չի ունեցել Հայաստանի կամ որեւէ այլ երկրի  հատուկ ծառայությունների հետ եւ պատրաստվում է հասնել վճռի ամբողջական վերացմանը։

Այս տարվա ամռանը նրան թույլատրել էին մեկնել երկրից՝ ընտանիքին այցելելու նպատակով։ Գործակալության հետ զրույցում Ռաուֆ Միրկադիրովն ասել է, որ ապաստան է խնդրել Շվեյցարիայից, քանի որ Ադրբեջնում իր ազատությունն ու առողջությունը վտանգված են։