FBI-ը թուրք-ամերիկյան կազմակերպությունների նկատմամբ քննություն է սկսել

Ամերիկայի Միացյալ Նահանգների հետաքննությունների դաշնային բյուրոն (FBI-ՀԴԲ) ուսումնասիրություն է սկսել մի շարք թուրք-ամերիկյան կազմակերպությունների նկատմամբ: Թուրքական «T24» լրատվական կայքի տեղեկացմամբ` այդ կազմակերպությունները ստեղծվել են  վերջին 2 տարվա ընթացքում և ԱՄՆ-ում Թուրքիայի դեսպանատան հետ համատեղ զբաղվում են Թուրքիային հետաքրքրող հարցերով, այդ թվում նաև Հայոց ցեղասպանության հարցով. տեղեկացնում է Ermenihaber-ը:

ՀԴԲ-ն  քննության շրջանակներում հարցաքննել է «Թուրք-ամերիկյան ղեկավար հանձնաժողովի», որը գործում է 100-ից ավել թուրք-ամերիկյան միությունների օժանդակությամբ, և  «Անկախ արդյունաբերողների և գործարարների միության» ղեկավարներին:

ԱՄՆ-ի արդարադատության նախարարության խոսնակ Մարկ Ռայմոնդին հրաժարվել է մեկնաբանություններ տալ գործի վերաբերյալ: Հետևաբար դեռևս պարզ չէ՝ ուսումնասիրության արդյունքում հետաքննություն կսկսվի, թե ոչ:

Թուրք-ամերիկյան ղեկավար հանձնաժողովն արդեն իսկ հայտարարություն է տարածել, որ ՀԴԲ-ն իրենց նկատմամբ հետաքննություն չի իրականացնում: