Նոր դատախազին կհաջողվի՞ կոտրել կարծրատիպերը

ՀՀ գլխավոր դատախազի թեկնածու Արթուր Դավթյանն այսօր խորհրդարանում լրագրողներին ասաց, թե ինքն աշխատելու է բացառապես օրենքով սահմանված կարգով: Ըստ նրա՝ այս պահին ինքը պարտավոր է գլխավոր դատախազի համար օրենքով սահմանված իրավունքներն ու պարտականությունները բարեխիղճ կատարել:

Դիտարկմանը, թե գլխավոր դատախազին նշանակում է Սերժ Սարգսյանը, և ժողովուրդը վստահ չէ, որ դատախազը կարող է ինքնուրույն գործել, քանի որ կառավարվում է Բաղրամյան 26-ից, նաև հարցին` պատրաստվո՞ւմ է կոտրել այս կարծրատիպը, Դավթյանը պատասխանեց. «Համաձայն չեմ ձեր տված գնահատականին, թե այս կարծրատիպը տարածված է, բայց իմ ամենօրյա աշխատանքում ամեն ինչ անելու եմ, որ հանրային վստահությունն ավելի բարձր լինի` դրանով իսկ ստանալով հանրային ավելի բարձր աջակցություն: Մենք ամենօրյա աշխատանքում դրա կարիքն ունենք»: