16 միլիոնը որեւէ օլիգարխից էլ կարող էին վերցնել. Թեւան Պողոսյան

Այսօր լրագրողների հետ զրույցում «Ժառանգություն» խմբակցության պատգամավոր Թևան Պողոսյանն անդրադարձավ ԸՕ-ի շուրջ 4+4+4 ֆորմատով համաձայնությունների ձախողմանը, ընդ որում` իշխանությունը մեջբերեց ժամանակային սղության հետ կապված խնդիրները:

Թևան Պողոսյանի խոսքով` երբ այդ հարցը քննարկվում էր ԱԺ նիստում, ինքն այդ ժամանակ է ասել, որ 4+4+4 ֆորմատով քննարկվում է մի հարց, որն ընտրական գործընթացի մասին չէ, այլ  ընտրությունների օրվա մեկ  կոմպոնենտի մասին: Եվ եթե ողջ ընտրական համակարգն ունի խնդիր, մեկ տարրի լուծումը չէր կարող բարձրացնել վստահությունը ընտրական ողջ համակարգի նկատմամբ:

«Երբ կառավարությունը  մերժում է պատգամավորների օրենսդրական նախաձեռնությունները, սովորաբար հիմնավորում է այն բյուջետային հաշվարկներ ու մեխանիզմներ  չներկայացնելու գործոնով: Մինչդեռ` կառավարությունը մերժեց իր իսկ  նախաձեռնած ԸՕ փոփոխությունները` անգամ զանգ չկատարելով նույն այդ լեհական կազմակերպությանը: Նույնիսկ երբ քննարկվում էր 16 միլիոն դոլար գտնելու հարցը, մենք մի քանի անգամ առաջարկեցինք` ինչո՞ւ են ուզում միջազգային դոնորներից այդ գումարը, կարող են որևէ օլիգարխից խնդրել, ԸՕ կողքին էլ կհիշատակեին այդ օլիգարխի անունը` գրելով ԸՕ` ըստ էսինչ օլիգարխի»,- ասաց Թևան Պողոսյանը:

Ինչ վերաբերում է ընտրացուցակների հրապարակման հավանականությանը, պատգամավորը կարծում է, որ իշխանությունը դրան չի գնա, համենայն դեպս` առաջիկա ՏԻՄ ընտրությունների համար` այդ խոստումը թողնելով խորհրդարանական ընտրություններին: