9-րդ հարկից ընկած տղամարդը որևէ վիրահատության կարիք չունի

Տեղեկացրել էինք, որ օգոստոսի 12-ին Երևանում ուշագրավ դեպք էր տեղի ունեցել` 36-ամյա տղամարդը շենքի 9-րդ հարկից ընկել էր բակում կայանված ավտոմեքենաներից մեկի վրա և, բարեբախտաբար, ողջ մնացել: Տղամարդը տեղափոխվել էր «Աստղիկ» բժշկական կենտրոն:

Yerkir.am-ի հետ զրույցում «Աստղիկ» բժշկական կենտրոնի տնօրեն Ռոբերտ Կուրղինյանը հայտնեց, որ տղամարդը ստացել է բազում կոտրվածքներ, որոնք, սակայն, կյանքի հետ համատեղելի են:

«Նա իրեն լավ է զգում, ավելին`  արդեն ուզում է տուն գնալ, սակայն պետք է խոսենք հարազատների հետ, և եթե նրանք էլ նույնը պնդեն, նրան դուրս կգրենք»,- ասաց Կուրղինյանը:

Նա  տեղեկացրեց նաև, որ տղամարդը որևէ վիրահատության չի ենթարկվել: