Նոր Նորքի թաղապետը եկել էր Թալին՝ «ընկերոջ տատիկին տեսնելու»

Քիչ առաջ լրագրողները Թալին քաղաքում, որտեղ ընթանում են քաղաքապետի ընտրություններ, նկատեցին Երեւանի Նոր Նորք վարչական շրջանի ղեկավար  Արմեն Ուլիխանյանին: Լրագրողների դիտարկմանը, թե Երեւանի համայնքի ղեկավարն ի՞նչ գործ ունի Թալինի ընտրությունների հետ, թաղապետը նախ հայտարարեց, թե ընկերոջ տատիկի տուն է եկել, այնուհետեւ հասկանալով, որ լրագրողները տեսել են իրեն շտաբից դուրս գալուց՝ խոստովանեց, որ եկել է կուսակցական ընկերոջն աջակցելու:

Yerkir.am-ի լրագրողի հարցին, թե իրեն բավարարու՞մ է Թալինի միջքաղաքային ճանապարհների վիճակը, թաղապետը խուսափողական պատասխան տվեց:  «Իմ մեքենան չի փչացել» ,- գոհ-գոհ հայտարարեց նա:

Վերջում էլ Ուլիխանյանը լրագրողներին հակադարձեց՝ «Իսկ ինչու՞ ես այստեղ չպետք լինեմ, գնացեք»:

 Նշենք, որ Թալինում են  Երեւանի այլ համայնքների ղեկավարներ եւս:

Ի դեպ, այս պահին Թալինի կենտրոնում բազմաթիվ մարդիկ են հավաքված, ովքեր գաղտագողի կազմակերպում են գործող քաղաքապետի օգտին քվեարկությունը: