Զիջումները պետք է փոխադարձ լինեն. Պուտինը` ԼՂ հակամարտության կարգավորման մասին

ՌԴ-ն չի պատրաստվում Հայաստանին և Ադրբեջանին «ինչ-որ պատրաստի բաղադրատոմսեր» պարտադրել: Այդ մասին ասել է ՌԴ նախագահ Վլադիմիր Պուտինը ադրբեջանական АзерТАдж-ին տված հարցազրույցում. հայտնում է РИА Новости-ն:

Նա ընդգծել է, որ կողմերը պետք է ինքնուրույն համաձայնության հասնեն` առանց արտաքին ճնշմումների, դա է Ռուսաստանի հստակ դիրքորոշումը:

Պուտինը մանրամասնել է, որ փոխհամաձայնության հասնելը պետք է ենթադրի օպտիմալ հավասարակշռություն տարածքային ամբողջականության և ժողովուրդների ինքնորոշման իրավունքի սկզբունքների միջև:

Ըստ ՌԴ նախագահի` կարգավորման վերջնական նպատակը այնպիսի համաձայնությունն է, որի դեպքում կողմերից ոչ մեկը չի լինի հաղթողի կամ պարտվողի դերում, զիջումները պետք է փոխադարձ լինեն, յուրաքանչյուր կողմի շահերը պետք է հասկանալի լինեն Հայաստանի և Ադրբեջանի հասարակական մտքի համար:

«Մենք անկեղծորեն հետաքրքրված ենք, որ տարածաշրջանում խաղաղություն և հանգստություն հաստատվի, որպեսզի այլևս անմեղ մարդիկ չզոհվեն, բացվեն սահմանները և վերականգնվեն տնտեսական կապերը»,- ասել է Պուտինը: