ԲՀԿ խմբակցության անկուսակցականները դեռ շվարած են

ԲՀԿ խմբակցության պատգամավորները, վերջին մի քանի ամսում դուրս գալով ԲՀԿ կուսակցությունից, ստեղծել են 3 առանձին և նոր կուսակցություններ` «Համախմբում», «Ալյանս», «Ռեֆորմիստներ»: ԲՀԿ խմբակցությունում կան նաև անկուսակցականներ, ովքեր, սակայն, դեռ որևէ պատկերացում չունեն իրենց քաղաքական ապագայի մասին: Խորհրդարանական ընտրություններին 8 ամիս է մնացել, նրանք դեռ չեն որոշել` ի՞նչ են անելու, ո՞ր քաղաքական ուժին են հարելու, մասնակցելո՞ւ են խորհրդարանական ընտրություններին, թե՞ ոչ:

Yerkir.am-ի հետ զրույցում ԲՀԿ խմբակցության պատգամավոր, անկուսակցական Հարություն Ղարագյոզյանը նշեց. «Քաղաքական ապագայի վերաբերյալ դեռ ոչ մի բան չեմ որոշել, չեմ կարող որևէ բան ասել: Նույնիսկ խորհրդարանական ընտրություններին իմ մասնակցության վերաբերյալ հարցին չեմ կարող պատասխանել, որովհետև որևէ կոնկրետ բան դեռ չեմ որոշել»:

Անկուսակցական Կարո Կարապետյանը, ինչպես միշտ, խուսափեց պատասխանից` ասելով. «Չգիտեմ, լիքը ուրիշ դեպուտատ կա, իրանցից հարցրեք»:

Իսկ Ռուստամ Գասպարյանը պատասխանեց. «Դեռ չեմ որոշել` կմասնակցե՞մ խորհրդարանական ընտրություններին, թե՞ ոչ»: