Կփոխհատուցվեն ոչ միայն զինծառայողի բուժման, այլև արտերկրում նրան ուղեկցողի ճանապարհի ու կեցության ծախսերը

Կառավարության վաղվա նիստի օրակարգում արդարադատության նախարարությունը ներառել է կառավարության որոշման փոփոխություն, որը նախատեսում է կարգավորել  «Զինծառայողների և նրանց ընտանիքների անդամների սոցիալական ապահովության մասին» օրենքը:

Գործող կարգի համաձայն` զինծառայողի համար նախատեսված կեցության գումարը ներառում է հիվանդանոցային պայմաններում կեցության հետ կապված ծախսերը` համաձայն տվյալ բժշկական կազմակերպությունից ստացված գրավոր տեղեկատվության հիման վրա, իսկ զինծառայողին ուղեկցող անձի համար նախատեսված կեցության գումարը` Հայաստանի Հանրապետության կառավարության 2005 թվականի դեկտեմբերի 29-ի N 2335-Ն որոշմամբ համապատասխան օտարերկրյա պետությունում (քաղաք, տարածք) գտնվելու համար սահմանված օրապահիկի և գիշերավարձի` համապատասխանաբար 50 տոկոսի չափով ծախսերը: Առկա ձևակերպումները կրում են  խիստ խտրական բնույթ, քանի որ ստացվում է, որ պետական մարմինների աշխատակիցներն օգտվում են Հայաստանի Հանրապետության կառավարության 2005 թվականի դեկտեմբերի 29-ի թիվ 2335-Ն որոշմամբ սահմանված հատկացումներից 100 տոկոսի չափով, մինչդեռ իր որդուն կամ ամուսնուն բուժման համար արտասահման մեկնած անձը` միայն դրա կեսի չափով:                                      

Նախագծով առաջարկվում որոշման հավելվածի 2-րդ կետի 4-րդ ենթակետից հանել «համապատասխանաբար 50 տոկոսի չափով» բառերը:

Նախագծով առաջարկվող փոփոխության արդյունքում ամբողջությամբ կփոխհատուցվեն ոչ միայն հայրենիքի պաշտպանության ընթացքում վիրավորված զինծառայողի բուժման, ճանապարհածախսի և կեցության ծախսերը, այլև ամբողջությամբ կփոխհատուցվեն ուղեկցող անձի ճանապարհածախսը և կեցության ծախսերը: