Ստվարաթղթե տանկի գործով դատախազը հրաժարվեց մեղադրանքից

Քիչ առաջ Կենտրոն և Նորք-Մարաշ վարչական շրջանների ընդհանուր իրավասության դատարանում մեղադրող դատախազը հրաժարվեց Արտակ Գևորգյանին առաջադրված մեղադրանքից՝ արարքում հանցակազմի բացակայության հիմքով: Նա նշեց, որ դատաքննության ընթացքում չի հիմնավորվել նրան առաջադրված մեղադրանքը: 

Այս պահին դատարանը խորհրդակցական սենյակում է՝ գործով վճիռ կայացնելու:

Հիշեցնենք, որ, համաձայն մեղադրական եզրակացության, Արտակ Գևորգյանը, հասարակության նկատմամբ բացահայտ անհարգալից վերաբերմունք դրսևորելով, այն է` անպատժելիության մթնոլորտ ստեղծելով, դրանով իսկ սեփական անձի ենթադրյալ առավելությունն ընդգծելով, 2015թ. դեկտեմբերի 10-ին` ժամը 01.30-ի սահմաններում, իր կողմից պատրաստված ստվարաթղթե հրասայլով դիտավորությամբ հարվածել է Երևան քաղաքի Նալբանդյան փողոցի թիվ 104 հասցեում գործող` ՀՀ ԿԱ ԱԱԾ-ի վարչական շենքի երկաթե դարպասներին և նման ձևով կոպիտ կերպով խախտել հասարակական կարգը, որն արտահայտվել է ԱԱԾ շենքում պահպանության ծառայություն իրականացնող աշխատակիցների բնականոն գործունեությունը խաթարելով և նրանց մոտ գույքի պահպանության կապակցությամբ վախի զգացում առաջացնելով: