Ապօրինաբար վերցրել են հիմնարկի տրանսպորտն ու գնացել` մասնավոր գործ անելու. «Երևան Ջուր»-ի պաշտոնյան` իրենց աշխատակցի մահվան մասին

Հայտնել ենք, որ երեկ` ժամը 21.06-ին, ԱԻՆ-ում ահազանգ է ստացվել, որ Երևանի Դավիթաշեն վարչական շրջանի Ձոր-1 թաղամասի դիտահորերից մեկում աշխատանքներ իրականացնելիս երկու քաղաքացու ինքնազգացողություն վատացել է: Փրկարարները դուրս են բերել 1964 թ. ծնված Ա. Թ.-ին, ով տեղափոխվել է «Արմենիա» հանրապետական բժշկական կենտրոն: Նրա առողջական վիճակը բժիշկները գնահատել են միջին ծանրության: Մյուս քաղաքացին մահացել է: Մահացածն ու տուժածը «Երևան Ջուր» ընկերության աշխատակիցներ են:

Yerkir.am-ի հետ զրույցում «Երևան Ջուր» ընկերության հանրային կապերի ծառայության պետ Մուրադ Սարգսյանը հայտնեց, որ ընկերության աշխատակիցները տվյալ հասցե են գնացել սեփական նախաձեռնությամբ` աշխատանքից դուրս, և կատարել են մասնավոր գործ: Նա տեղեկացրեց, որ ընկերությունում ստեղծվել է աշխատանքային հանձնաժողով, որը քննարկում է դեպքի մանրամասները:

«Ամեն դեպքում մի բան պարզ է` նրանք ապօրինաբար վերցրել են հիմնարկի տրանսպորտը և գնացել են` մասնավոր գործ անելու, ընդ որում` նրանք նույն հիմնարկի գործ անողներ չեն եղել, ընկերությունն իրավական առումով որևէ առնչություն չունի դեպքի հետ»,- ասաց Սարգսյանը:

Նա նշեց, որ իրենց մոտ աշխատանքային ժամը մինչև 6-ն է, իսկ դեպքը տեղի է ունեցել 6-ից հետո:

Ըստ Սարգսյանի` մեքենան ամրակցված է վարորդին, այսինքն` նրանից չի պահանջվում ղեկավարության ցուցումը, որպեսզի աշխատակցին տեղափոխի: «Փաստորեն, վարորդը, առանց թույլտվության, երեկոյան ժամի գնացել է` մասնավոր գործունեությամբ զբաղվելու: Ցավոք, դժվախտ պատահար է տեղի ունեցել»,- ասաց նա:

Մեր զրուցակիցը նաև նշեց, որ չգիտի, թե կոնկրետ ինչպես է տեղի ունեցել դեպքը: «Մենք էլ ենք շահագրգռված` հասնանալու` ինչու են գնացել, ում տունն է եղել: Նախ` մարդուն ցանկանանք առողջություն, մնացածն էլ ինչ եղել է` կպատմեն, կիմանանք»,-ասաց Մուրադ Սարգսյանը:

Նշենք, որ դեպքի հանգամանքները պարզելու համար քննություն է ընթանում: