ԼՂՀ ՊՆ-ն պարզաբանում է հայտնի հրամանատարների պաշտոնանկության պատճառները

Այսօր ԼՂՀ ՊՆ-ն, պատասխանելով Yerkir.am-ի գրավոր հարցամանը, հայտնել էր, որ ապրիլյան մարտական գործողություններից հետո Արցախի զինված ուժերում եղել են ինչպես պաշտոնից ազատումներ, այնպես էլ պաշտոնի բարձրացումներ:

Yerkir.am-ը ԼՂՀ ՊՆ-ից փորձեց պարզել նաև ԼՂՀ զինված ուժերում կատարված` առավել ուշագրավ պաշտոնանկությունների, մասնավորապես` Ջաբրայիլի (Ջրական) զորամասի հրամանատար, գնդապետ Հովիկ Աբրահամյանի և Մատաղիսի զորամասի հրամանատար, գնդապետ Հարություն Ամիրխանյանի պաշտոնանկությունների պատճառները:

Ի պատասխան մեր գրավոր հարցման` ԼՂՀ ՊԲ տեղեկատվության և հասարակայնության հետ կապերի բաժնի պետ, գնդապետ Սենոր Հասրաթյանը հայտնել է, որ Հովիկ Աբրահամյանը և Հարություն Ամիրխանյանը պաշտոնից ազատվել են վերադաս հրամանատարության հրամանով` համաձայն «Զինվորական ծառայության անցնելու մասին» օրենքի համապատասխան հոդվածի, այն է` պարտականությունների կատարման մեջ թերանալու հիմնավորումով, և այս պահի դրությամբ գտնվում է ՊՆ կադրերի վարչության տրամադրության տակ:

Իսկ ինչ վերաբերում է հիշյալ բարձրաստիճան սպաների կատարած թերացումների փաստերով քրեական գործերի հարուցմանը, ԼՂՀ ՊՆ-ից պատասխանել են, որ այս պահի դրությամբ նման տեղեկության չեն տիրապետում: