ՓՊ-ում կքննվի նույնասեռական Ժուժուի հասցեին արտահայտված փաստաբանի դեմ հարուցված կարգապահական վարույթը

Հունիսի 13-ին ՀՀ փաստաբանների պալատի խորհրդի նիստում կքննեն  փաստաբան Գարիկ Գալիկյանի նկատմամբ հարուցված կարգապահական վարույթը: Այս մասին Yerkir.am-ը տեղեկացավ ՀՀ փաստաբանների պալատից: Նշենք, որ փաստաբանի դեմ կարգապահական վարույթ էր հարուցվել «Նոր Սերունդ» Մարդասիրական ՀԿ-ի 22.02.2016թ.-ի դիմումի համաձայն` կապված «Կիսաբաց լուսամուտներ» հաղորդաշարի ընթացքում փաստաբանի կողմից արված հայտարարության հետ:

Հիշեցնենք, որ 2016թ. փետրվարի 19-ին «Ա-ԹիՎի» հեռուստաընկերության «Կիսաբաց լուսամուտներ» հաղորդաշարի հերթական ծրագրի ժամանակ Ժուժուն` հաղորդման հերոս Էդգարը, հայտնել էր, որ չի կարողանում աշխատանք գտնել, որովհետև նույնասեռական է, և այդպիսի վերաբերմունքն իր նկատմամբ ներկայացրել էր որպես հասարակության կողմից դրսևորվող խտրականություն:

Հաղորդման փորձագետ հյուրերից` փաստաբան Գարիկ Գալիկյանն էլ հայտարարել էր. «Ես միշտ, միշտ ու միշտ պայքարել եմ իրանց դեմ, պայքարում եմ ու պայքարելու եմ: Երբ տեսնեմ, տրորելու եմ, ոտնատակ եմ տալու նրանց, և այո’, նրանց պետք է վառել: Կարող եք իմ նկատմամբ քրեական գործ հարուցել, կարող եք հաղորդում տալ»: Նաև հավելել էր. «Այո՛, իմացի՛ր, որ հալածում են ձեզ, ու ես միշտ հալածելու եմ քո նմաններին»: