Վերադարձ 10-ամյա կրթությանն այլևս չի լինի. ԿԳ նախարար

Վերադարձ 10-ամյա կրթությանն այլևս չի լինի, քանի որ եթե վերադառնանք դրան, ապա մեր երեխաների վկայականը որևէ այլ երկրում չեն ճանաչի. այսօր լրագրողներին ասաց ՀՀ ԿԳ Նախարար Լևոն Մկրտչյանը:

Նա նշեց, որ անհրաժեշտ է ընդամենը, որ ավագ դպրոցը կատարելագործվի:

«Խոսքը վերաբերում է ավագ դպրոցի հոսքային առարկաների ավելի խորացմանը և կրթական ծրագրերի բեռնաթափմանը: Երեխան, որը 11-12-րդ դասարաններում մասնագիտական կողմնորոշում է ստանում, պետք է մյուս առարկաներից աստիճանաբար բեռնաթափվի: Նրանք պետք է պատրաստվեն իրենց հետագա մասնագիտական կրթությունը շարունակելուն: Հիմա, ըստ էության, իներցիայով 12-րդ դասարանները շարունակում են նույն ծանր կրթական ծրագիրը. ի՞նչ է նշանակում` 6 քննություն հանձնել 12-րդ դասարանում»,- ասաց Մկրտչյանը:

Նա նշեց նաև, որ պետք է ձևավորենք ազգային կրթական համակարգ: