ԱԺ-ում կրճատել են չօգտագործվող մեքենաները

ԱԺ-ում շարունակվում են 2015թ. բյուջեի կատարողականի քննարկումները:

Հաշվետվություն ներկայացրեց ԱԺ աշխատակազմի ղեկավար Հրայր Թովմասյանը: Անդրադառնալով վերջին օրերի արդիական թեմային՝ ծառայողական մեքենաների կրճատմանը, նա նշեց, որ ԱԺ աշխատակազմը այդ առումով կրճատումներ է արել, և այս պահի դրությամբ շահագործվում է ընդամենը 69 ծառայողական մեքենա:

ԱԺ պատգամավոր Էդմոն Մարուքյանը հարց ուղղեց Հրայր Թովմասյանին, թե ո՞ր պաշտոնյաներն այսուհետ պետք է հասարակական տրանսպորտից օգտվեն:

Հրայր Թովմասյանը պատասխանեց, որ այս պահի դրությամբ շահագործվում է 69 ծառայողական մեքենա, հաշվեկշռում կա 11 մեքենա: Ծառայողական մեքենաներից օգտվում են հանձնաժողովների նախագահները, խմբակցությունների ղեկավարները, ԱԺ նախագահն ունի սպասարկող մեքենաներ, անվտանգության աշխատակիցների մեքենաներ: Ծառայողական մեքենաներից օգտվում են նաև ԱԺ նախագահի տեղակալները, ԱԺ աշխատակազմի ղեկավարը, ղեկավարի տեղակալը, ԱԺ վարչության պետերը: Կան նաև հյուրերին սպասարկող մեքենաներ և հերթապահ մեքենաներ:

Էդմոն Մարուքյանը հետաքրքրվեց` եթե չօգտագործվող մեքենաներ են կրճատվել, ապա ինչո՞ւ էին մինչ այդ գումար հատկացնում դրանց համար:

Հրայր Թովմասյանն էլ պատասխանեց, որ նախկինում գումար էր հատկացվում չօգտագործվող մեքենաների տեխզննման և ապահովագրության համար, հիմա հենց այդ գումարներն են կրճատվել: