Առողջապահության նախարարությունում կրճատվելու է 74 ծառայողական մեքենա

Այսօր լրագրողների հետ զրույցում առողջապահության նախարար Արմեն Մուրադյանը, խոսելով վարչապետի հանձնարարականի մասին` ծառայողական մեքենաների կրճատման վերաբերյալ, ասաց, որ առողջապահության նախարարությունում կկրճատվի մոտ 70-74 ծառայողական մեքենա:

Ըստ նախարարի` դրանք այն մեքենաներն են, որոնք դեռևս 1980-ականներից ընդգրկված են առողջապահության նախարարությունում և սպասարկում են մարզերին:

«Սեղմ միջոցներով կփորձենք իրականացնել աշխատանքները մարզերում` ապահովելով նույն արդյունավետությունը»,- ասաց նա:

Մուրադյանը հավելեց, որ օպտիմալացման համատեքստում մարզերում որոշ առողջապահական հիմնարկներ կմիավորվեն:

Ինչ վերաբերում է նախարարության աշխատողների կրճատմանը, նախարարը նշեց, որ այդ հարցը երկար ժամանակ է, ինչ քննարկվում է: