Կամավորականների իրավական կարգավիճակի հարցը լուծված չէ

Այսօր ԱԺ նիստում կառավարության հետ հարցուպատասխանի ժամանակ ՀԱԿ խմբակցության պատգամավոր Գագիկ Ջհանգիրյանը հարց ուղղեց պաշտպանության նախարարությանը կամավորների վերաբերյալ: Նա նշեց, որ կամավորականներն այսօր փաստացի մարտական հերթապահություն են իրականացնում, զենք է նրանց տրամադրվել, սակայն նրանք զինծառայողներ չեն, և ժամանակն է, որ օրենքով կանոնակարգվեն նրանց հետ կապված խնդիրները:

Պաշտպանության նախարար Սեյրան Օհանյանը նշեց, որ այն կամավորները, ովքեր վիրավորվել են մարտական գործողությունների ժամանակ, օգտվում են սոցիալական պաշտպանության օրինական արտոնություններից, որոնցից օգտվում են զինծառայողները, ընդունվել է համապատասխան որոշում:

«Ինչ վերաբերում է ծառայության հետագա կազմակերպմանը, դա կամավոր իրավունքի շրջանակներում է, և ցանկության դեպքում կամավորները կարող են հետ վերադառնալ»,- ասաց նախարարը:

Գագիկ Ջհանգիրյանը արձագանքեց,որ խոսքը ոչ թե սոցիալական խնդիրների, այլ իրավական կարգավիճակի մասին է: Եթե նրանք, օրինակ, կանոններ խախտեն, չեն ենթարկվում պատասխանատվության, նրանցով ռազմական ոստիկանությունը չի զբաղվում, այնպես որ` այդ հարցերը նորմատիվ կարգավորման կարիք ունեն: