Եթե Արցախից դուրս գնացողները վերադառնան, Արցախի հարցը լուծված կլինի

Ղարաբաղն ազատ, անկախ է, և կարևորն այն է, որ տարիներ առաջ չնվաճեցինք ուրիշի հողերը, մենք մերն ազատագրեցինք. այսօր` լրագրողների հետ հանդիպման ժամանակ, ասաց գրող, հրապարակախոս Մերուժան Տեր-Գուլանյանը` շնորհավորելով Արցախի անկախության 25-ամյակի կապակցությամբ:

Ըստ նրա` 25 տարին հրաշալի տարիք է` ծառայել ես, կրթություն ստացել և հիմա պետք է մտնես կյանք ու կարողանաս ինքդ քեզ դրսևորել: «Հիմա եթե Արցախից դուրս գնացողները վերադառնան, Արցախի հարցը լուծված  կլինի: Երբ լինում ես Արցախում, հիացմունքով մի բան ես արձանագրում, որ այնտեղ կայացել է քաղաքացին.` նման ուշադրություն իր գյուղի, շրջապատի հանդեպ այստեղ չկա»,- ասաց Տեր-Գուլանյանը:

Նա նշեց նաև, որ մի հարցում համոզված է` Արցախը պետք է մասնակցի միջազգային բոլոր բանակցություններին, իր ճակատագրի հետ կապված բոլոր քննարկումներին պետք է ներկա լինի:

Խոսելով այս ընթացքում Արցախի մասին պատմող գրականության մասին` Տեր-Գուլանյանը նշեց, որ, ցավոք, արժեքավոր մի գործ, որն ամբողջովին կներկայացնի Արցախը, այդպես էլ չի ստեղծվել: «Մեր մտավոր, գրական ու մշակութային միտքը պետք է բացահայտի Արցախը:  Բացառությամբ Լևոն Խեչոյանի մի քանի պատմվածքների, որևէ լուրջ գործ չի ստեղծվել Արցախի մասին, և Ղարաբաղի էությունը դեռ չի բացահայտվել մեր գրական գործերի միջոցով»,- կարծիք հայտնեց նա: