Գերմանացի մտավորականները Մերկելին կոչ են արել ճանաչել Հայոց ցեղասպանությունը

Գերմանացի մտավորականները բաց նամակով դիմել են կանցլեր Անգելա Մերկելին և Բունդեսթագի պատգամավորներին` կոչ անելով ընդունել Հայոց ցեղասպանությունը ճանաչող օրինագիծը:

Ըստ Dmeokrathaber-ի` գերմանական Die Zeit թերթում հրատարակված բաց նամակում մտավորականները կոչ են արել պաշտոնապես ճանաչել Հայոց ցեղասպանության մասին օրինագիծը, որը հունիսի 2-ին ներկայացվելու է Բունդեսթագի օրակարգում: Նախաձեռնությանը միացած մտավորականների թվում է նաև Գերմանիայում բնակվող թուրք կինոռեժիսոր Ֆաթիհ Աքընը, ով Հայոց ցեղասպանության մասին աղմկահարույց ֆիլմ էր նկարահանել:

Մտավորականները գերմանացի պաշտոնյաներից պահանջել  են հունիսի 2-ին հստակ դիրքորոշում ցուցաբերել և հայ ազգի դեմ կատարված հանցանքի ճիշտ անունը տալ` օգտագործելով «ցեղասպանություն» բառը: Նամակում հարց է ուղղվել. «Պատկերացրեք` ապրում եք այնպիսի Գերմանիայում, ուր Հոլոքոստը հերքվում է: Սա չի՞ նշանակում, որ հանցանքը շարունակվում է»:

Եվրոպայի հիմնական արժեքներին հավատարիմ մնալու և արտահայտությունները հստակեցնելու կոչ անող նամակում մասնավորապես ասվում է. «Հայոց ցեղասպանության հերքումը հող է նախապատրաստում նոր բռնության համար: 1915 թվականին հայերին «ահաբեկիչ» որակեցին և նրանց ունեցվածը բռնագրավեցին: Իսկ հիմա Թուրքիայում ավելի քան 5000 քուրդ սպանվեց: Հիմա նրանց էլ են «ահաբեկիչ» որակում: Այս ամենը տեղի է ունենում այն պատճառով, որ Թուրքիան չի առերեսվում սեփական պատմության հետ, և միջազգային հանրությունը նրա` այսօրվա գործողություններին պատասխան չի տալիս»:

Թարգմանությունը` Արազ Գայմագամյանի