Այսուհետեւ կնշանակի ոչ թե նախագահը, այլ պաշտպանության նախարարը

Կառավարության այսօրվա նիստում պաշտպանության նախարար Սեյրան Օհանյանը ներկայացրեց որոշման փոփոխություն, որի արդյունքում ՀՀ ՊՆ ռազմաարդյունաբերական վարչության հենքի վրա ստեղծված ՊՆ ռազմարդյունաբերական պետական կոմիտեի նախագահին նշանակում է Հայաստանի Հանրապետության նախագահը:

Որպես ՀՀ նախագահի կողմից նշանակվող անձ` կոմիտեի նախագահի պաշտոնը պետք է դասակարգվի հայեցողական կամ քաղաքացիական պաշտոն, որի նպատակով անհրաժեշտ է լինելու համապատասխան լրացում կատարել «Հանրային ծառայության մասին» ՀՀ օրենքում:

Բացի այդ` կոմիտեի նախագահի պաշտոնը որպես հայեցողական կամ քաղաքացիական պաշտոն նախատեսելու դեպքում առաջ է գալիս տվյալ պաշտոնի վարձատրության չափի սահմանման հարցը, որի պարագայում պետք է համապատասխան կարգավորում նախատեսվի «Պետական պաշտոններ զբաղեցնող անձանց վարձատրության մասին» ՀՀ օրենքում:

Վերը նշված օրենքներում լրացումներ և փոփոխություններ կատարելուց խուսափելու նպատակով առաջարկվում է սահմանել, որ կոմիտեի նախագահին նշանակում է ՀՀ պաշտպանության նախարարը, ինչը հնարավորություն կտա առանց որևէ օրենսդրական փոփոխության կոմիտեի նախագահի պաշտոնը նախատեսել որպես քաղաքացիական հատուկ ծառայության պաշտոն:

Որոշումն ընդունվեց: