Եթե դեմ ենք ՌԴ-ի կողմից Ադրբեջանին զենք վաճառելուն, ապա ինչո՞ւ ենք գնում թուրքական ապրանք. «Հանուն օրենքի» նախաձեռնության անդամ

Թուրքիայում արգելված է Հայաստանից ապրանք ներմուծելը, մինչդեռ Հայաստանում Թուրքիայից ապրանքի նեմուծումն արգելված չէ. այսօր լրագրողներին ասաց «Հանուն օրենքի» նախաձեռնության անդամ Արման Ղուկասյանը:

«2008-2014 թվականներին Թուրքիայից 1,5 մլրդ դոլարի ապրանք է ներմուծվել: Եթե մենք դեմ ենք ՌԴ-ի կողմից Ադրբեջանին վաճառված զենքին, ապա ինչո՞ւ ենք գնում թուրքական ապրանք: Այս քառօրյա պատերազմը ցույց տվեց, որ Թուրքիան ֆինասավորում է Ադրբեջանին, վարձկաններ է տրամադրում: Եթե մենք Թուրքիայից ապրանք չներմուծենք, չենք ասում, որ սրանով թուրքական էկոնոմիկան կոլապս կապրի, բայց մենք ճիշտ կվարվենք բարոյական տեսանկյունից»,- ասաց նախաձեռնության անդամը:

Նույն նախաձեռնության համակարգող խորհրդի անդամ Ծովինար Կոստանյանն էլ նշեց, որ վաղը` ժամը 12:00-ին, իրենք պատրաստվում են կառավարության շենքի առջև բողոքի ակցիա իրականացնել, այնուհետև նամակ հանձնել կառավարությանը, որով պահանջելու են արգելք սահմանել Թուրքիայից Հայաստան ներմուծվող ապրանքի նկատմամբ: «Մենք չենք կարող վստահ լինել, որ Թուրքիայից եկող այդ սննդի միջոցով դիվերսիա չի կիրառվի, կամ էլ վտանգավոր բակտերիաներ չեն լինի այդտեղ»,- մտահոգություն հայտնեց նախաձեռնության անդամը, ապա հավելեց, որ մեր շուկայում կան ապրանքներ, որոնց վրա գրված է` «Սա թուրքական չէ», և լավ կլինի, որ մենք օգտվենք հենց այդ ապրանքներից, մանավանդ` այն պարագայում, որ այժմ ԵՏՄ անդամ ենք և այլընտրանք ունենք: