Ջաբրայիլում զոհված 19-ամյա Գևորգը դեպքի նախորդ օրն էր խոսել ծնողների հետ. մանրամասներ

Ապրիլի 19-ին ՊԲ հարավային ուղղությամբ (Ջաբրայիլի) տեղակայված զորամասերից մեկի պահպանության տեղամասում հակառակորդի կողմից արձակված կրակոցից զոհված 19-ամյա զինծառայող Գևորգ Գևորգյանը Լոռու մարզի Աքորի գյուղից էր։

Yerkir.am-ին Գևորգի համագյուղացիները պատմեցին, որ նա անապահով ընտանիքից էր. ընտանիքում 6 երեխա էին` երեք տղա, երեք աղջիկ: Գևորգի 20-ամյակը լրանալու էր սեպտեմբերին: Նրա մեծ եղբայրը նույնպես ծառայել է Արցախում:

Մեզ հետ զրույցում Աքորիի գյուղապետ Հրահատ Սիմոնյանն ասաց, որ ծնողները դեպքի նախորդ օրն են խոսել տղայի հետ: «Շատ բան չեն խոսել, միայն ասել է, որ լավ է, ամեն ինչ կարգին է»,- պատմեց գյուղապետը:

Նա հայտնեց, որ Գևորգի հոգեհանգիստը տեղի կունենա այսօր գյուղի մշակույթի տանը: