Էկոնոմիկայի նախարարն ընդունել է Իրանի դեսպան Սեյեդ Քազեմ Սաջադին

Ապրիլի 14-ին ՀՀ էկոնոմիկայի նախարար Արծվիկ Մինասյանն ընդունել է Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան Սեյեդ Քազեմ Սաջադին:

Հանդիպման առանցքում եղել են Հայաստանի  և Իրանի առևտրատնտեսական հարաբերությունների բարելավման հարցերը: Մասնավորապես, անդրադարձ է կատարվել ներդրումային ոլորտում գործունեության աշխուժացմանը, Հայաստանում  իրանական կապիտալի ներգրավման միջոցով արտադրության հիմնման հնարավորություններին, մաքսային ընթացակարգերին, վարչարարության պարզեցմանը: Կարևորվել է զբոսաշրջության ոլորտում առկա հնարավորությունների  և ներուժի ամբողջական օգտագործման անհրաժեշտությունը:

Նախարար Մինասյանը նշել է տեղեկատվական տեխնոլոգիաների ոլորտում հայկական ընկերությունների արտադրանքն  իրանական շուկա արտահանելու ուղղությամբ կատարված աշխատանքը, այդ գործընթացի հետագա ընդլայման համար անհրաժեշտ քայլերը: 

Դեսպան Սեյեդ Քազեմ Սաջադին, իր հերթին, կարևորել է վերջին շրջանում տեղի ունեցած հանդիպումների, համաժողովների ընթացում քննարկված հարցերի ուղղությամբ գործնական կոնկրետ քայլերի իրականացումը, նշելով, որ իրանական կողմը լիովին պատրաստակամ է աջակցելու տարբեր ոլորտներում համագործակցության խորացմանը:

Անդրադարձ է եղել նաև ընթացիկ տարվա սեպտեմբերին Իրանում  նախանշվող ՏՏ ոլորտի և թվային մեդիայի միջազգային  ցուցահանդեսին հայկական կողմի մասնակցության, ինչպես նաև, հոկտեմբերի 5-9-ը Թեհրանում  միջազգային արդյունաբերական ցուցահանդեսին, առանձնացված տաղավարով,  «Հայաստան Էքսպո» հայկական ապրանքների և ծառայությունների ցուցահանդեսին առնչվող հարցերին:  

Հանդիպման ավարտին կողմերը պայմանավորվել են առավել հաճախակի դարձնել նման հանդիպումները` քննարկված հարցերին արդյունավետ լուծումներ տալու համար: