Ռուսական լրատվամիջոցներն աղավաղել են ԼՂՀ ներկայացուցչի խոսքը

Ըստ ռուսական լրատվամիջոցների` ՌԴ-ում ԼՂՀ մշտական ներկայացուցչության առաջին դասի խորհրդական Արսեն Մելիք-Շահնազարյանը լրագրողների հետ հանդիպման ժամանակ նշել է, թե իբր հայկական կողմն ունի 50 մարդկային կորուստ: Նա, ըստ ԶԼՄ-ների, նաև նշել է, թե հայկական կողմին այդպես էլ չի հաջողվել Ադրբեջանից հետ գրավել հարավում մեր ունեցած 3 դիրքերը:

Yerkir.am-ի հետ զրույցում ԼՂՀ նախագահի մամուլի քարտուղար Դավիթ Բաբայանը նշեց, որ ռուսական լրատվամիջոցներն ամբողջությամբ աղավաղել են ինֆորմացիան:

«Ինֆորմացիան չի համապատասխանում իրականությանը: Իրավիճակն այսպիսին է`  Մոսկվայում հանդիպում է եղել, և նա ներկայացրել է այն, ինչ կա, բայց նրա տված տեղեկություններն աղավաղել են, մասնավորապես` կորուստների հարցով: Արսենն օգտագործել է ռազմական տերմինաբանություն` ասելով` մեր կորուստները կազմում են 50-ից ավելի: Այդ կորուստների մեջ, ըստ ռազմական տերմինաբանության, ներառված են ինչպես զոհվածները, այնպես էլ անհայտ կորածները, վիրավորները և գերիները: Իսկ նրանք, կորուստ ասելով, միայն զոհվածներ են հասկացել և այդպես ներկայացրել»,- ասաց Բաբայանը: