Նռնականետի հարվածից վիրավորված Աղաջանյանների վիճակը կայուն ծանր է

Ստեփանակերտի Հանրապետական բժշկական կենտրոնում այս պահին բուժում է ստանում հակառակորդի կրակոցներից տուժած 4 քաղաքացի:

Yerkir.am-ի հետ զրույցում ԼՂՀ առողջապահության նախարարության մամուլի ծառայությունից տեղեկացրեցին, որ դեռ ապրիլի 2-ին հիվանդանոց են տեղափոխվել 55-ամյա Ծովինար Աղաջանյանը և 43-ամյա Գարեգին Աղաջանյանը: «Քույր ու եղբայր են, հակառակորդի նռնականետի հարվածից են վիրավորվել: Ծովինարի մոտ առկա է աջ բազկի վնասվածք, բազկոսկրի կոտրվածք` հոդի վնասվածքով, ձախ բազկի փափուկ հյուսվածքների վնասվածքներ, իսկ Գարեգինի մոտ` որովայնի և բարակ աղու վնասվածքներ: Գարեգինը բուժումը շարունակում է վիրաբուժական բաժանմունքում: Ծովինարին նույնպես այսօր տեղափոխեցին վիրաբուժական բաժանմունք` երեկ վերքը վիրակապելուց հետո»,- ասացին նախարարության մամուլի ծառայությունից:

Ի դեպ, Աղաջանյանների առողջական վիճակը, ըստ բժիշկների, կայուն ծանր է: