Նույն մարդը` 4 կրոնական կազմակերպության ղեկավար. Սևան Աղաջանյան

Հայաստանում կան գրանցված մի շարք կրոնական կազմակերպություններ, որոնք ոչ կրոնական գործունեությամբ են զբաղվում. այսօր լրագրողներին ասաց «Ազգային արժեքների պահպանման ճակատ» ՀԿ-ի նախագահ Սևան Աղաջանյանը:

Նրա հավաստմամբ` օրինակ` Ռընե Լևոնյանի անունով 4 կրոնական կազմակերպություն է գրանցված` Ֆրանսիայի «Հույս Հայաստանի համար», Հայ ավետարանչական ընկերակցություն, Հայաստանի ավետարանական եկեղեցի և Հայաստանի ավետարանական եկեղեցիների միություն:

«Եթե սրանք բոլորը տարբեր կրոնական կազմակերպություններ են, ապա ուղղակի զավեշտ է, որ նույն մարդը կարող է լինել տարբեր դավանական ուղղություն ունեցող 4 կազմակերպության ղեկավար: Թե ի՞նչ գործունեությամբ են զբաղվում, մենք չկարողացանք հստակ պարզել, բայց կարծում եմ, որ դրսից գումարներ հայթայթելու միջոց է: Այնուամենայնիվ, կոչ կանեի պատկան մարմիններին` ստուգել կրոնական կազմակերպությունների աշխատանքը»,- ասաց Աղաջանյանը:

Նա հայտնեց, որ այս շաբաթ իրենք էլ ոստիկանություն են դիմելու, որպեսզի ճշտումներ իրականացվեն, թե ինչ գործունեությամբ են զբաղվում վերոհիշյալ կառույցները:

Yerkir.am-ը պատրաստ է լսել նաև երկրորդ կողմի տեսակետը: