Ադրբեջանցիների կողմից վիրավորված բերքաբերցուն տեղափոխել են Երևան

Արդեն հայտնել ենք, որ վերջին 24 ժամերի ընթացքում Ադրբեջանի կողմից ՀՀ սահմանագոտու ամբողջ երկայնքով, ինչպես նաև ԼՂՀ ՊԲ պատասխանատվության գոտում ինտենսիվորեն կիրառվել են ինչպես հրաձգային զենքեր, այնպես էլ 60 և 82 մմ-ոց ականանետներ և ՏՌ-107 համազարկային հրթիռային կայանքներ: Երեկ երեկոյան Տավուշի մարզի Բերքաբեր գյուղում իր տան մոտ հրազենային վիրավորում է ստացել ՀՀ քաղաքացի Նորիկ Ալիխանյանը:

Բերքաբերի գյուղապետ Արթուր Մադաթյանը Yerkir.am-ի հետ զրույցում պատմեց, որ 58-ամյա Նորիկ Ալիխանյանն իր տան մոտ կանգնած է եղել և ուսի, մեջքի շրջանում է վիրավորվել: «Հիմա վիճակը նորմալ է, Աստծոն փառք, լավ ենք պրծել: Սկզբում տեղափոխեցինք Իջևանի բժշկական կենտրոն, առաջին օգնություն ցույց տվեցին, հետո արդեն տեղափոխեցինք Երևան` «Էրեբունի» ԲԿ»,- ասաց գյուղապետը և հավելեց, որ մյուս գյուղացիներին էլ պատճառվել են նյութական վնասներ. Ալիխանյանի հարևանի կովն է սատկել, իսկ գյուղացիներից մեկի տունն էլ փամփուշտ է ընկել ու պայթել:

«Էրեբունի» ԲԿ-ի մամուլի խոսնակ Շուշան Հունանյանից տեղեկացանք, որ Նորիկ Ալիխանյանի վիճակն այժմ կայուն է, կյանքին վտանգ չի սպառնում, գտնվում է թոքային վիրաբուժության բաժնում, վերքը վիրակապվել է, և դեռ հայտնի չէ` կվիրահատե՞ն նրան, թե՞ ոչ: