Դիվերսիան հետ մղելիս վիրավորված զինծառայողին ուղղաթիռով տեղափոխում են Երեւան

Հունվարի 2-ի լույս 3-ի գիշերը, ինչպես հայտնի է, թշնամին  հարավային և արևելյան ուղղություններով ձեռնարկել էր դիվերսիոն հետախուզական երկու գործողություն: Հակառակորդին դիմակայելու ընթացքում, հիշեցնենք, զոհվել են ՊԲ զինծառայողներ Կարեն Սամվելի Գրիգորյանը և Վարդան Մարտիկի Մկրտչյանը. գրում է ԳԱԼԱ-ն:

«Իսկ զինծառայող Վոլոդյա Գագիկի Հարությունյանը ստացել էր վիրավորում եւ տեղափոխվել Ստեփանակերտի զինվորական հոսպիտալ:  Այսօր ԳԱԼԱ-ի հետ զրույցում հոսպիտալի հերթապահ բժշկուհին փոխանցեց, որ Վոլոդյա Հարությունյանին տեղափոխում են մայրաքաղաք՝ բուժումը շարունակելու նպատակով:

Վոլոդյան վիրավորում ստացել է երիկամի շրջանում. «Հարությունյան Վալոդյան գալիս է Երեւան, երիկամի պրոբլեմ ունի, բերում են, մենք համապատասխան գործիքներ չունենք, այդ իսկ պատճառով  ուղղաթիռով տեղափոխեցին Երեւան՝Մուրացան հոսպիտալ, այստեղ նախնական բուժում ստացել է, մնացած բուժումը կստանա Երեւանում»,-ասաց Ստեփանակերտի զինվորական հոսպիտալի բժշկուհին:

Արցախի վարչապետի մամլո խոսնակ Արտակ Բեգլարյանը մեզ հետ զրույցում մեկնաբանեց  թշնամու կողմից սահմանում իրականացվող սադրանքներն ու նշեց, թե ղարաբաղյան հիմնախնդրով զբաղվող միջազգային կառույցները պետք է ճնշումներ գործադրեն հակառակորդի վրա.

«Դրանք հերթական սադրանքներն են Ադրբեջանի կողմից, բայց մյուս կողմից մեզ համար նորություն չեն: Հատկապես տոն օրերին եւ հենց տարեսկզբին նմանատիպ սադրանքներ են անում, մենք կորուստներ ենք ունենում, իրենք էլ են կորուստներ ունենում, բայց իրենց չեն վշտացնում մարդկային  կորուստները: Կարծում եմ՝ միջազգային հանրությունը  լրջորեն հետեւություններ պետք է անի, քանի որ զինադադարը պահպանելը բանակցային հիմնական մեխերից մեկն է, եւ կարծում եմ, որ միջնորդները պետք է համապատասխան ճնշում գործադրեն Ադրբեջանի հանդեպ»,-նշեց Արտակ Բեգլարյանը»,- հայտնում է լրատվամիջոցը:

Մանրամասն` սկզբնաղբյուրում: