Ավանում 7 կրակոցից վիրավորված երիտասարդը դեռևս վերակենդանացման բաժանմունքում է

Փետրվարի 28-ի լույս 29-ի գիշերը Ավանում անհայտ անձանց կողմից բազմաթիվ հրազենային վնասվածքներ ստացած 25-ամյա Արթուր Գևորգյանը շարունակում է մնալ «Սուրբ Գրիգոր Լուսավորիչ» բժշկական կենտրոնի վերակենդանացման բաժանմունքում: Այս մասին yerkir.am-ին հայտնեցին հիվանդանոցից:

Ի պատասխան մեր գրավոր հարցմանը՝ ՀՀ քննչական կոմիտեի դեպարտամենտի տեղեկատվության և հասարակայնության հետ կապերի վարչությունից էլ հայտնեցին, որ այս գործով դեռևս կասկածյալներ չկան:

«ՀՀ քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժնում շարունակվում է Ա. Գևորգյանի նկատմամբ սպանության փորձի դեպքի առթիվ հարուցված քրեական գործի նախաքննությունը: Քրեական գործով էական հարցեր պարզելու նպատակով նշանակվել են փորձաքննություններ, որոնց պատասխանները դեռ չեն ստացվել»,- ասված է մեզ ուղղված գրության մեջ:

Հիշեցնենք, որ երիտասարդը վերջույթների և որովայնի շրջանում 7 հրազենային վերք էր ստացել: