Զրպարտություն է. Դավութօղլուն փորձում է հերքել քրդերի դեմ իրականացված գործողությունները

Թուրքիայի վարչապետ Ահմեդ Դավութօղլուն ամեն կերպ փորձում է հերքել այն փաստը, որ մի շարք քրդաբնակ շրջաններում բախումների հետևանքով քաղաքացիներ են վիրավորվում և զոհվում:

Ըստ Demokrathaber-ի՝ Ջիզրեի շենքերի նկուղներում օգնության սպասող վիրավորների մասին տեղեկությունը հերքելով՝ Դավութօղլուն հայտարարել է. «Ես կոչ եմ անում մի շարք զրպարտություններով Թուրքիայի վրա բիծ թողնել ցանկացողներին և մեջլիսում այդ մասին հայտարարողներին՝ որտե՞ղ են այդ վիրավորները»:

Պնդելով, որ շտապօգնության մեքենաները ակտիվ գործել են բախումների շրջանում, և դիմելով դա հերքողներին՝  նա հավելել է. «Վիրավորներն ու զոհերը տեղափոխվել են ամենալավ պայմաններում: Սա՞ է ձեր հարգանքը մահացածների նկատմամբ»:

Նշենք, որ Ջիզրեում իրավիճակը լուրջ է: Թուրք ուժայինների և քուրդ զինյալների միջև զինված բախումների հետևանքով վիրավորվում և զոհվում են խաղաղ քաղաքացիներ: Վիրավորվելու դեպքում շտապօգնության մեքենա չի ժամանամ, ինչի պատճառով էլ  վիրավորներին ճարահատյալ հավաքում են շենքերի նկուղներում՝ նրանց եղած միջոցներով օգնություն ցուցաբերելու համար:

Նախորդ շաբաթվա ընթացքում համացանցում տեսանյութ էր հայտնվել, որն ի ցույց էր դնում փաստը, թե ինչպես են թուրք զինվորները կրակ բացում սպիտակ դրոշները ձեռքներին՝ իրենց զոհերին և վիրավորներին այլ վայր տեղափոխել ցանկացող քրդերի վրա: