ՄԽ համանախագահներն ավելի շատ ջանք են թափում Ադրբեջանին խելքի բերելու վրա. Էդվարդ Նալբանդյան

Այսօր  ԱԳ նախարար Էդվարդ Նալբանդյանը լրագրողների հետ հանդիպման ընթացքում ամփոփեց 2015-ին նախարարության գործունեությունը:

Ըստ նրա` առանձնահատուկ կարևորություն է ունեցել Հռոմի պապ Ֆրանցիսկոսի կողմից Սուրբ Պետրոս տաճարում հատուկ պատարագ մատուցելը` Հայոց ցեղասպանության 100-ամյա տարելիցի կապակցությամբ: «Դա կարևորագույն ուղերձ էր, որը համաշխարհային հնչեղություն ստացավ»,- ասաց Էդվարդ Նալբանդյանը:

Ինչ վերաբերում է ԼՂ հիմնախնդրի կարգավորմանը, ապա, նախարարի խոսքով, 2015-ին Հայաստանը շարունակել է Մինսկի խմբի համանախագահների հետ համատեղ ջանքերը` ուղղված Ղարաբաղյան հիմնախնդրի` բացառապես խաղաղ կարգավորմանը:

«Նոր թափ են ստացել Ադրբեջանի կողմից հրադադարի կոպտագույն խախտումները` մեծ տրամաչափի զինատեսակների կիրառմամբ, ինչը հանգեցրել է բազմաթիվ մարդկային կորուստների, ներառյալ` քաղաքացիական բնակչության շրջանում: ՄԽ համանախագահները իրենց կոչերում հասցեական հորդորներ են հնչեցրել` Ադրբեջանին ուղղված, որ զերծ մնա հակամարտության գոտում իրավիճակի սրումից և միակ միջնորդ` ՄԽ ջանքերը քննադատելուց: Ադրբեջանն արհամարհել է համանախագահների` իրեն ուղղված կոչերը, գնացել է իրավիճակի առավել սրման, ինչի արդյունքում չի հաջողվել առաջընթաց գրանցել ինչպես հիմնախնդրի կարգավորման հիմնարար սկզբունքների համաձայնեցման շուրջ, այնպես էլ հրադադարի պահպանման ամրապնդման շուրջ,- նշեց Նալբանդյանը:

Անդրադառնալով Հայաստանի և Ադրբեջանի նախագահների վերջին հանդիպմանը` նա նշեց, որ այն ուղղված էր հակամարտության գոտում լարվածության նվազեցմանը: Եվ հանդիպումը դարձյալ ցույց տվեց, որ Ադրբեջանի դիրքորոշումը հակասում է ոչ միայն Հայաստանի, այլ նաև ՄԽ համանախագահների մոտեցումներին:

Նալբանդյանը հավելեց, որ եռանախագահները շատ մեծ ջանքեր են վատնում ոչ թե հիմնախնդրի բանակցային կարգավորման, այլ Ադրբեջանին խելքի բերելու վրա` թույլ չտալու համար, որ Ադրբեջանը առավել սրի իրավիճակը: Մինչդեռ Ադրբեջանը չի հարգում այդ հայտարարությունները` ծանր հրետանի կիրառելով շփման գծում: