Իմ աղջկան 38,5 ջերմությամբ չհոսպիտալացրեցին, իսկ Շուշանիկ Բախշյանին անմիջապես տարան հիվանդանոց. Վաղինակ Մարգարյան

Ծննդկան Մերի Մարգարյանի մահվան մեջ մեղադրվող` «Շենգավիթ» ԲԿ-ի բժշկուհի Շուշանիկ Բախշյանի մոտ, ով հունվարի 23-ին դատարանի որոշմամբ ազատ էր արձակվել, կասկածում էին խոզի գրիպ, սակայն ՀՀ գլխավոր ինֆեկցիոնիստ Արա Ասոյանը, անձամբ այցելելով Շուշանիկ Բախշյանին, ասել է, որ նրա մոտ չկա խոզի գրիպ, պարզապես սովորական գրիպ է: Այս մասին Yerkir.am-ի հետ զրույցում ասաց Մերի Մարգարյանի հայրը` Վաղինակ Մարգարյանը: Նա համոզված է` Բախշյանն ու Ասոյանը մտերիմ հարաբերություններ ունեն, և բժշկուհու հոսպիտալացվելը բեմադրություն է:

«Ախր, էդ ամեն ինչը բեմականացում է: Հետնամուտքից բժշկուհու մոտ գնալը, նրան հոսպիտալացնելը և այլն… Այս ամենը ամբողջությամբ բեմադրություն է: Իմ աղջիկն ու թոռը հենց այնպես մահացան: Ես մինչև վերջ եմ պայքարելու, մինչև Եվրադատատարան էլ կգնամ: Պետք չէ, թող Շուշանիկ Բախշյանն իր մեղքը չընդունի, թող մեղմացուցիչ հանգամանքներ նրա համար չլինեն: Իմ աղջիկը 38,5 ջերմություն ուներ մի քանի օր, նրան չհոսպիտալացրեցին, իսկ Շուշանիկ Բախշյանը մի թեթև հիվանդացավ, ջերմությունը 38,5 դարձավ, անմիջապես տարան հիվանդանոց»,- ասաց Մերի Մարգարյանի հայրը:

Հիշեցնենք, որ Կենտրոն և Նորք-Մարաշ վարչական շրջանների ընդհանուր իրավասության դատարանը հունվարի 23-ին պարտավորեցրել էր քննիչին` ազատ արձակել նախօրեին ձերբակալված Շուշանիկ Բախշյանին, ով կասկածվում է ծննդկան Մերի Մարգարյանի և նրա նորածին դստեր մահվան մեջ: Նշենք նաև, որ, ըստ Քննչական կոմիտեի տարածած հաղորդագրության, «Շենգավիթ» ԲԿ-ի բժշկուհի Շուշանիկ Բախշյանը ցուցաբերել է անբարեխիղճ վերաբերմունք, ինչի հետևանքով հղիության 35-րդ շաբաթում գտնվող Մերի Մարգարյանը մահացել է: