Րաֆֆի Հովհաննիսյանի բերանը ո՞վ էր փակել կամ ձեռքերն ո՞վ էր բռնել. Վահրամ Բաղդասարյան

2015 դեկտեմբերին սահմանադրական փոփոխությունների հանրաքվեից հետո 2016-ի կարևորագույն ներքաղաքական իրադարձությունը կդառնա նոր Ընտրական օրենսգրքի ընդունումը: Ներկա պահին կառավարության անդամներն աշխատում են ԸՕ նախագծի վրա, եկող շաբաթ նախագիծը կուղարկեն ԱԺ, որտեղ էլ կսկսվեն քննարկումները:

Հայտնի է, որ ՀԱԿ-ը, որը դեմ էր սահմանադրական փոփոխություններին, նոր ԸՕ ընդունման հետ կապված հանդես է եկել հայտարարությամբ, որում ասվում է, որ ԸՕ ընդունումը իմաստ կունենա, եթե մաքրվեն ուռճացված ընտրացուցակները, եթե դրանք հրապարակվեն, ընտրամասերը տեսանկարահանվեն և այլն:

Yerkir.am-ի հետ զրույցում ԱԺ ՀՀԿ խմբակցության ղեկավար Վահրամ Բաղդասարյանը, խոսելով ՀԱԿ-ի այդ հայտարարության մասին, նշեց. «ՀԱԿ-ի հայտարարությունը սիրողական մակարդակի էր»:

Հայտնի է նաև, որ «Ժառանգություն» կուսակցության ղեկավար Րաֆֆի Հովհաննիսյանը, ով այժմ հանդես է գալիս որպես «Նոր Հայաստան» շարժման անդամ, հայտարարել է, որ չի մասնակցելու Ընտրական օրենսգրքի վերաբերյալ քննարկումներին: «Րաֆֆի Հովհաննիսյանի բերանը ո՞վ էր փակել կամ ձեռքերն ո՞վ էր բռնել, որ մինչև այժմ եղած քննարկումներին մասնակցի, կամ ո՞վ է նրա իրավունքները սահմանափակել: Ինչ է` հայտնագործությո՞ւն է, որ Րաֆֆի Հովհաննիսյանը չի մտնում քննարկումների մեջ: Պարզապես Րաֆֆի Հովհաննիսյանը, որպես քաղաքացի և քաղաքական ուժի ներկայացուցիչ, պարտավոր է մասնակցել քննարկումներին»,- ասաց Վահրամ Բաղդասարյանը: