Սրտաբանը խորհուրդ է տալիս երկար չնստել ամանորյա սեղանի շուրջ

ՀՀ առողջապահության նախարարության գլխավոր  սրտաբան Համլետ Հայրապետյանը խորհուրդ է տալիս ամանորյա տոներին սեղանի մոտ երկար նստած չմնալ:

«Բնականաբար, Ամանորին մեր սեղանները հագեցած են  լինում յուղոտ, ճարպոտ, մսային,  շատ խոլեստերին պարունակող, դժվարամարս սննդով և այդ ամենը սրտային հիվանդություններ ունեցողների մոտ հանգեցնում է սրտի բեռնվածության: Հիպերտոնիայով, սրտի իշեմիկ հիվանդությամբ տառապող հիվանդների մոտ կարող են սրացումներ առաջանալ (ճնշման բարձրացում, նոպաներ)  սեղանների մոտ երկար, դինամիկ  նստելուց, օգտվելուց»,-Yerkir.am-ի հետ զրույցում ասաց նա:

Հայրապետյանը նշեց, որ կան  սրտային հիվանդություններ, որոնց դեպքում  որոշակի քանակի խմիչքը հակացուցված չէ, սակայն դա էլ բժիշկը պետք է որոշի, քանի որ հիվանդությունները տարբեր են: Սակայն, ըստ նրա, այնուամենայնիվ, խմիչքը պետք է սահմանափակ օգտագործել:

«Եթե նույնիսկ տվյալ հիվանդին թույլատրված է խմիչքի օգտագործումը, չարաշահումը հանգեցնում է սրացումների և հիվանդության վատ ընթացքի»,- ասաց նա:

Գլխավոր սրտաբանը խորհուրդ տվեց զերծ մնալ վնասակար սովորություններից (օրինակ` ծխելը), հաճախ զբաղվել ֆիզկուլտուրայով, պարբերաբար ֆիզիկական վարժություններ կատարել:

Մասնագետի խոսքով՝ կրծքավանդակի շրջանում առաջացած ցավերի դեպքում պետք է դիմել բժշկի: