Բաղանիսի գյուղապետը արյուն է հանձնում ականի պայթյունից վիրավորված համագյուղացուն

Արդեն հայտնել ենք, որ Տավուշի մարզի Ոսկեպար գյուղի եկեղեցու հարևանությամբ ականի պայթյունի հետևանքով երկու մարդ է վիրավորվել: Yerkir.am-ի տեղեկություններով՝ երկու վիրավորներն էլ  Բաղանիս համայնքի բնակիչներ են՝ Արտավազդ Կարապետյանը և Արշակ Սահակյանը:

Yerkir.am-ի հետ զրույցում Տավուշի մարզպետարանի աշխատակազմի սոցապ եւ առողջապահության վարչության պետ Նարեկ Վանեսյանը հայտնեց, որ երկու տուժածներն էլ անգիտակից վիճակում են, նրանցից մեկը գտնվում է Նոյեմբերյանի ԲԿ-ում, մյուսը՝ Իջևանի: Վանեսյանը հայտնեց, որ Իջևանի ԲԿ-ում գտնվող Արտավազդ Կարապետյանի ձախ ոտքի ստորին մեկ երրորդականից և ձախ ձեռքի նախաբազկի միջին երրորդականից ամպուտացիա է կատարվել:

«Այս պահին փորձում ենք կարգավորել տուժածի հեմոդինամիկան, այդ նպատակով հիվանդանոցում է Բաղանիսի գյուղապետ Նարեկ Սահակյանը, ով պատրաստվում է իր համագյուղացուն արյուն հանձնել»,- ասաց նա:

Վանեսյանի խոսքով՝ Արշակ Սահակյանի աջ ոտքի  ստորին երրորդականն է ամպուտացիայի ենթարկվել, բացի այդ` նա ստացել է  աջ ազդոսկրի բեկորային կոտրվածք: