Անհամեմատ քիչ են եղել ընտրախախտումների վերաբերյալ հանձնաժողովների անդամների հաղորդումները

ՀՀ Սահմանադրության փոփոխությունների` 2015 թ. դեկտեմբերի 6-ի հանրաքվեի ընթացքում տեղ գտած իրավախախտումների վերաբերյալ ՀՀ քննչական կոմիտեի տարածքային քննչական վարչություններում և բաժիններում ստացվել է 201 հաղորդում, որոնցից 124-ը վերաբերվում են Երևան քաղաքում, 77-ը` մարզերում տեղ գտած խախտումներին. այսօր լրագրողներին հայտնեց ՀՀ քննչական կոմիտեի նախագահի տեղակալ Արամ Թամազյանը:

Նրա խոսքով` խախտումների մեծ մասը վերաբերում է մեկից ավելի անգամ կամ այլ անձի փոխարեն քվեարկելուն, լրատվամիջոցների ներկայացուցիչների և հանձնաժողովների անդամների նկատմամբ ճնշումներ գործադրելուն:

«Կատարված վերլուծությունները ցույց են տալիս, որ անհամեմատ քիչ են ընտրախախտումների վերաբերյալ ընտրական հանձնաժողովների անդամների կողմից ներկայացված հաղորդումները, հակառակ դրան` ահազանգերի հիմնական մասը լրատվամիջոցների հրապարակումներն են»,- ասաց նա:

Թամազյանի խոսքով` այս պահի դրությամբ` հարուցվել է 12 քրեական գործ, սակայն դեռևս որպես մեղադրյալ ներկայացված անձ չկա: Նշենք, որ 12 քրեական գործերից 8- հարուցվել են Երևան քաղաքում, իսկ 4-ը մարզերում տեղ գտած հանցագործությունների փաստով: