«Ահաբեկչություն» բառի կիրառումը մեծ բացթողում էր. Տիգրան Քոչարյան

Մեդիափորձագետ Տիգրան Քոչարյանն այսօր լրագրողների հետ հանդիպման ընթացքում անդրադարձավ օրեր առաջ Նորք-Մարաշում տեղի ունեցած միջադեպին ու դրա հետևանքներին, ազդեցությանը: Քոչարյանի խոսքով`մեծ քանակությամբ զենք ու զինամթերք պահող այդ անձանց ահաբեկչական խումբ անվանելը շատ սխալ է, որովհետև գոյություն ունի անմեղության կանխավարկած:

«Որևէ տեղ ապացուցված չէ նրանց մեղքը: Պարզապես զինված խմբավորում է ձերբակալվել: Անշուշտ, այդ զենքը պետք է օգտագործվեր, սակայն դա պատկան մարմինները կբացահայտեն»,- ասաց նա` հավելելով, որ լուրջ բացթողում էր այն, որ ԱԱԾ-ից առաջ լրագրողներն են տարածել տեղեկատվությունը, թե զինված խմբավորման անդամներից մեկն արտասահմանցի է:

Ըստ Քոչարյանի` այս լուրը լուրջ խուճապ է առաջացրել հասարակության շրջանում, և այն այս օրերին բաժանվել է երեք կատեգորիայի` մարդիկ, ովքեր հավատացին, որ սա զինված հարձակման փորձ էր, մարդիկ, ովքեր չհավատացին դրան, և  մարդկանց երրորդ խումբն էլ ծաղրուծանակի է ենթարկում այդ ամենը:

«Բացթողում են նման երևույթները: Մենք մոռանում ենք, որ մեր դաշտը մոնիթորինգի է ենթարկվում նույն Ադրբեջանի կողմից: Բավական զգույշ պետք է նկարագրել այսպիսի վիճակները, մեծ ուշադրություն պետք է դարձվի նմանատիպ երևույթներին: Ամենամեծ բացթողումն այս պարագայում «ահաբեկչություն» բառի կիրառումն էր»,- ասաց Քոչարյանը:

Yerkir.am-ի դիտարկմանը, թե իրավապահ մարմինները բավական երկար ժամանակ լրագրողների մուտքն այդ տարածք արգելել էին, մինչդեռ` հետո լրատվական դաշտի ներկայացուցիչներն ազատ ելումուտ ունեին, մեդիափորձագետը պատասխանեց, որ ԱԱԾ աշխատակիցների առաջնային նպատակը վնասազերծելն է եղել, և երկար ժամանակ հետո են միայն լրագրողները կարողացել մուտք գործել տարածք:

«ԱԱԾ աշխատակիցները հասցրել էին պատշաճ աշխատել, հետո արդեն թողել են, որ լրագրողները ելումուտ անեն: Ինձ համար էլ էր տարօրինակ, որ լրագրողների ազատ ելումուտ եղավ»,- ասաց Քոչարյանը: