Վեդու ջրամբարին հատկացված 75 մլն եվրո վարկը կմեղմի Արարատյան դաշտավայրի սակավաջրության հարցը

Այսօր կառավարության նիստում ֆինանսների նախարար Գագիկ Խաչատրյանը ներկայացրեց Վեդու ջրամբարի ֆինանսավորման նպատակով Հայաստանի և Զարգացման ֆրանսիական գործակալության միջև 75 մլն եվրո արժողության վարկային համաձայնագրի նախագծի կնքմանը հավանություն տալու հարցը: Համաձայնագիրը հնարավորություն կտա Արարատյան դաշտավայրում մեղմելու սակավաջրության հարցը, ինչպես նաև  մեխանիկական ոռոգումից անցում կատարելու ինքնահոս եղանակի, ինչը կհանգեցնի էլեկտրախնայողության: Վարկի մարման ժամկետը 20 տարի է:

Վարչապետ Հովիկ Աբրահամյանը հավելեց. «Բոլորդ տեղյակ եք, որ կառավարությունը ջրամբարաշինությունը հայտարարել է գերակա ոլորտ: Հանձնարարում եմ բոլոր գերատեսչություններին` արագ կազմակերպել և սկսել շինարարական աշխատանքները»: