Այս բյուջեն չունի տնտեսական քաղաքականություն. Հրանտ Բագրատյան

Այսօր ԱԺ հերթական քառօրյայի նիստում ԱԺ ընդդիմադիր պատգամավոր, նախկին վարչապետ Հրանտ Բագրատյանը ելույթ ունեցավ 2016թ. բյուջեի նախագծի վերաբերյալ: Նրա խոսքով` այս բյուջեի խնդիրն այն չէ, որ այն գնալով պակասում է, բյուջեի ամենավտանգավոր բանն այն է, որ եթե քայլեր չձեռնարկվեն, ապա մյուս տարի բյուջեի նախագիծն էլ ավելի վատն է լինելու, էլ ավելի է պակասելու, երկիրն ավելի ետ է գնալու: 

«Խնդիրն այն է, որ բյուջեի նախագծում ներկայացված չէ տնտեսական քաղաքականության մոդել, որովհետև կառավարությունում չեն վերլուծում: Արդյունքում ՝ այս կառավարությունը մոտավորապես արժանանալու է նույն բախտին, ինչ նախորդ կառավարությունը»,- ասաց Հրանտ Բագրատյանը՝ հավելելով, որ թե\' նախորդ կառավարությանն են զգուշացրել, թե\' այս կառավարությանն են շարունակում զգուշացնել:

Ըստ նրա` նախորդ կառավարությունը չէր հասկանում ասվածը ու համառորեն ասում էր՝ մակրոտնտեսական ստաբիլիզացիա: Պատգամավորն օրինակ բերեց` ասենք` բաղնիքի ջերմաստիճանը պետք է լինի 37 աստիճան, բայց բաղնիքում լողանալու համար նաև տաք ջուր է պետք, չէ՞ որ խնդիրը տաք ջուրն է ու լողանալը, իսկ 37 աստիճան ապահովելը դա պայման է, ահա և կառավարությունը շարժվում է նույն մեթոդաբանությամբ, իսկ երբ մեկ-երկու հոգի նրանց ասում են, թե ինչ տնտեսական քաղաքականություն վարեն, կառավարության անդամները նրանց չեն լսում:

«Քաղաքականությունն այն չէ, երբ ասում եք` բնօգտագործման համար միջոցառումներ կանցկացվեն, որ գետերը չաղտոտվեն: Պիտի միջոցառումներ անեիք, որ գետերն աղտոտվեի՞ն: Քաղաքականություն չէ, պարո\'ն Արտեմ Ասատրյան, երբ ասում եք՝ հաշմանդամներին այսքան սայլակ ենք տալու, դա էլ չանե՞ք: Բայց ո՞րն է սոցիալական քաղաքականությունը, ինչպե՞ս եք բաշխելու եկամուտները, որ նպաստի տնտեսության աճին, սա չկա»,- ասաց պատգամավորը:

Նա նաև կրկին հնչեցրեց իր առաջարկը` ստեղծել քառասուն ռազմականացված բնակավայր, որտեղ կզինեն մարդկանց: