«Այո»-ի կողմնակիցները գնալով շատանում են. Արթուր Նալբանդյան

Հայաստանի` 2016 թվականի բյուջեի քննարկման ժամանակ խորհրդարան էին եկել նաև մարզպետեր:

Լոռու մարզպետ Արթուր Նալբանդյանը լրագրողների հետ զրույցում հայտարարել էր, որ իրենց մարզում սահմանադրական բարեփոխումների  քարոզարշավը դեռևս ակտիվ ընթացքի մեջ չէ: Այսօր նա Yerkir.am-ին հայտնեց, որ Լոռու մարզում վերջին օրերին բարեփոխումների վերաբերյալ տրամադրվածությունը բավականին փոխվել է: «Նախորդ անգամ ասացինք, որ դեռևս ակտիվ չէ, քանի որ քարոզարշավն իր բնականոն ընթացի մեջ չէր մտել: Հիմա արդեն ընթացքի մեջ է, և ես կասեմ, որ ժողովրդի մոտ լուրջ ակտիվություն է նկատվում: Մարդկանց հետաքրքրությունն է արթնացել: Նախկինում, թեկուզ փոքր հանդիպումների ժամանակ, զգում էինք, որ չկա այդ հետաքրքրվածությունը, հիմա, սակայն, հարցուպատասխաններից հստակ երևում է, որ ժողովուրդը սկսել է լուրջ հետաքրքրվել»,- համոզմունք հայտնեց մարզպետը:

Նալբանդյանը նշեց, որ իրենց համար 20 օրը բավական է, որպեսզի կարողանան ժողովրդին ամբողջական իրազեկել սահմանադրական բարեփոխումների վերաբերյալ: «Այս պահին վաղ է խոսել` «այո»-ի կողմնակիցնե՞րն են շատ, թե՞ «ոչ»-ի, բայց  պետք է ասեմ, որ «այո»-ի կողմնակիցները գնալով ավելի են շատանում»,- ասաց մարզպետը:

Նա նշեց նաև, որ որքան իր ժամանակը ներում է,  ինքն էլ է մասնակցում իրազեկման հավաքներին: «Աշխատանքից հետո կամ էլ շաբաթ-կիրակի օրերին ենք մենք զբաղվում: Մնացած քարոզչախմբերը կան և աշխատում են: Ես այսօր սահմանադրական բարեփոխումների հետ կապված հանդիպում ունեմ: Թումանյանի տարածաշրջանում հանդիպելու եմ նաև բնակիչների հետ»,- ասաց Արթուր Նալբանդյանը: