Մատների թանաքոտումը մերժվում է, առաջարկվում է «ոսկե միջին» տարբերակը

ԱԺ արտահերթ նիստում քննարկվում է ԱԺ ՀՀԿ-ական պատգամավորներ Հովհաննես Սահակյանի, Գագիկ Մինասյանի, Արտակ Դավթյանի և Գագիկ Մելիքյանի կողմից ներկայացված՝ «ՀՀ ընտրական օրենսգրքում փոփոխություններ և լրացումներ կատարելու մասին» և «Նույնականացման քարտերի մասին» օրենքում փոփոխություն կատարելու մասին օրինագծերի փաթեթը երկրորդ ընթեցմամբ քննարկելու և ամբողջությամբ ընդունելու հարցը:

Հիմնական զեկուցող Հովհաննես Սահակյանը նշեց, որ քննարկել են և որոշել գտնել խնդրի լուծման ոսկե միջինը, որը ընդունելի կլինի հանրության կողմից: Նա նշեց, որ առաջարկություններ եղել են ՀՀԿ, ԲՀԿ, ՀՅԴ և ՀԱԿ խմբակցությունների կողմից: Ըստ այդմ՝ մատները թանաքոտելու առաջարկը չի ընդունվել, քանի որ դա հսկայածավալ ընթացակարգային պրոցես է, բացի այդ՝ ժամանակը չի բավարարում այդ հարցը պատշաճ լուծելու համար: Սահակյանի անձնական կարծիքով՝ մատները թանաքոտելը բնորոշ է հետադիմական երկրներին, օրինակ` Աֆղանստանին, մինչդեռ՝ եվրոպական երկրներն այդ տարբերակից չեն օգտվում:

Ընդունվել է այն առաջարկը, որը ներկայացրել են ՀՀԿ, ԲՀԿ և ՀՅԴ խմբակցությունները, այն է` ընտրացուցակներու՝ լրացուցիչ նշումների սյունակում, նշվի, թե որ քաղաքացիներն են ընտրական պրոցեսին մասնակցել նույնականացման քարտերով, որը հետո կհաշվառվի ու առանձին արձանագրություն կազմվի, թե որքան մարդ է քվեարկության մասնակցել այդ ընտրատեղամասում նույնականացման քարտով: