Շտապօգնություն կանչե՞մ, թե՞ անվտանգության աշխատակիցներին. Գալուստ Սահակյանը չէր կողմնորոշվում

Այսօր ԱԺ հերթական քառօրյա նիստում, երբ քննարկվում էր ԿԲ դրամավարկային ծրագրի տարեկան հաշվետվությունը, և ելույթ էր ունենում ՀՀԿ խմբակցության պատգամավոր Հայկ Բաբուխանյանը, միջադեպ տեղի ունեցավ «Ժառանգություն» խմբակցության ղեկավար Զարուհի Փոստանջյանի ու ԱԺ նախագահ Գալուստ Սահակյանի միջև: Զարուհի Փոստանջյանը, ինչ-որ թղթերի տրցակը ձեռքին, բարձրացավ այն ամբիոնը, որտեղ նստած էին Գալուստ Սահակյանն ու Հերմինե Նաղդալյանը, և սկսեց ինչ-որ բան պահանջել Գալուստ Սահակյանից:

Հայկ Բաբուխանյանը պահանջեց նրանից լռել, քանի որ նրա աղմուկը չի թողնում ելույթ ունենալ: Զարուհի Փոստանջյանը սկսեց վիճել Գալուստ Սահակյանի հետ: «Ստիպում եք, որ օրենք կիրառեմ»,- ասաց Գալուստ Սահակյանը: «Ինչ օրենք, օրենքը Դուք եք խախտել»,- Գալուստ Սահակյանին զայրացած դիմեց Զարուհի Փոստանջյանը և հեռացավ:

«Հիմա չգիտեմ՝ շտապօգնություն կանչե՞մ, թե՞ անվտանգության աշխատակիցներին»,- ասաց Գալուստ Սահակյանը: