Արամ Մանուկյանն անհասկանալի պատճառով հայտնվեց ոստիկանական մեքենայի մեջ. Վալերի Օսիպյան

ԱԺ շենքի դարպասների մոտ ոստիկանների և ցուցարարների միջև տեղի ունեցած հրմշտոցի արդյունքում անհասկանալի պայմաններում ոստիկանական մեքենայի մեջ էր հայտնվել նաև ՀԱԿ խմբակցության պատգամավոր Արամ Մանուկյանը:

Երևանի փոխոստիկանապետ Վալերի Օսիպյանը Yerkir.am-ի հարցին, թե ինչպե՞ս է ստացվել, որ ՀԱԿ պատգամավոր Արամ Մանուկյանին նույնպես ցանկացել են բերման ենթարկել, պատասխանեց, որ չի եղել նման բան:

«Նա անհասկանելի պատճառով հայտնվեց ոստիկանական ավտոբուսի մեջ: Երբ ցուցարարներին  արդեն տանում էին ոստիկանության բաժին, այնպես ստացվեց, որ նա էլ հայտնվել էր ավտոբուսի մեջ: Հնարավոր է` չեն ճանաչել: Ասեմ, որ ոստիկանները պարտավոր չեն ճանաչել Արամ Մանուկյանին: Պատգամավորը կարող էր, մոտենալով հավաքի մասնակիցներին, համապատասխան բեյջ ունենալ վրան փակցված, կամ էլ ինչ-որ կերպ նրա վրա նշված լիներ, որ ինքը ԱԺ պատգամավոր է»,- ասաց Օսիպյանը` հավելելով. «Ի դեպ, ես Արամ Մանուկյանին առաջարկեցի, որ իջնի ոստիկանական ավտոբուսից, նա հրաժարվում էր իջնել: Ես նրան ասացի, որ եթե չիջնի, ստիպված կլինի իջեցնել, բայց նա այդպես էլ չիջավ»: