Զուրաբյանը «խուժան» անվանեց Օսիպյանին

Քիչ հետո ԱԺ նիստում պետք է քվեարկության դրվի սահմանադրական փոփոխությունների նախագիծը: Իսկ այս պահին սահմանադրական բարեփոխումների դեմ պայքարողները հավաքվել են ԱԺ-ի դարպասների մոտ: Ոստիկանները նրանց արգելեցին պաստառ փակցնել ԱԺ դարպասներին կամ բարձրանալ դարպասների վրա: Սկսվեց հրմշտոց բողոքի ակցիայի ու ոստիկանների միջև: Բողոքի ակցիայի մասնակիցները սկսեցին հայհոյել փոխոստիկանապետ Վալերի Օսիպյանին, նա հունից դուրս եկավ: Օսիպյանի ու քաղաքացիների միջև հրմշտոցը փորձեցին կանխել ոստիկանները:

Քաղաքացիների մոտ իջան ՀԱԿ պատգամավորներ Արամ Մանուկյանն ու Լևոն Զուրաբյանը: Արամ Մանուկյանը բարկացած խոսում էր ոստիկանների հետ, իսկ ոստիկանները արձագանքում էին. «Ես «արա» չեմ քեզ համար»: Օսիպյանն էլ վիճում էր Լևոն Զուրաբյանի հետ` ասելով, որ թույլ չեն տա պաստառ փակցնել ԱԺ դարպասներին:

Իրավիճակը սրվեց, ոմանց բերման ենթարկեցին: Ինչից հետո Զուրաբյանը բորբոքված ելույթ ունեցավ եւ Օսիպյանին անվանեց «խուժան»: