ԱԺ-ում խոսափողերի «դավադրությանը» հաջորդեց ՀԱԿ-ի պահանջի բավարարումը

ԱԺ հինգերորդ գումարման նստաշրջանի առաջին նիստում սահմանադրական փոփոխությունների նախագիծն էր ներկայացնում սահմանադրական փոփոխությունների մասնագիտական հանձնաժողովի անդամ Վարդան Պողոսյանը: Նրա՝ ժամեր տևած ելույթից հետո, երբ ԱԺ նախագահ Գալուստ Սահակյանը պետք է հայտարարեր հարցեր տալու համար հերթագրման մասին, պարզվեց, որ նրա խոսափողը չի աշխատում:

Գալուստ Սահակյանը փորձեց Էդուարդ Շարմազանովի խոսափողից օգտվել, պարզվեց՝ դա էլ չի աշխատում: Եվ շուրջ 10 րոպե խոսափողերն անջատված էին: Անորոշ վիճակ էր ստեղծվել: Այդ ընթացքում պատգամավորներն աշխուժացան, սկսեցին ծիծաղել ու հումորներ անել:

Երբ վերջապես միացրեցին ԱԺ նախագահի խոսափողը: Նա ասաց. «ՀԱԿ խմբակցությունն առաջարկել էր, որ սահմանադրական փոփոխությունների քննարկման գործընթացը ԱԺ-ում հեռարձակվի Հանրային հեռուստաընկերությամբ: Մենք դա մերժել էինք` ԱԺ կանոնակարգ-օրենքի համաձայն: Սակայն Հանրային հեռուստաընկերությունը հանձն է առել ապահովել նիստերի հեռարձակումը: Հիմա դա լա՞վ է, թե՞ վատ է»: