Սա ոչ թե նոր Սահմանադրության, այլ սահմանադրական փոփոխությունների նախագիծ է. Վարդան Պողոսյան

ԱԺ պետա-իրավական հարցերի մշտական հանձնաժողովում քննարկվում է սահմանադրական փոփոխությունների նախագիծը: Ներկա են սահմանադրական փոփոխությունների մասնագիտական հանձնաժողովի անդամներ Վարդան Պողոսյանն ու Հրայր Թովմասյանը, ինչպես նաև ՀՀԿ-ական պատգամավորներ, ՀՅԴ պատգամավոր Արծվիկ Մինասյանը, ՀԱԿ պատգամավոր Գագիկ Ջհանգիրյանը, արդարադատության նախարար Արփինե Հովհաննիսյանը, «Ժառանագություն» խմբակցության պատգամավոր Զարուհի Փոստանջյանը:

Մասնագիտական հանձնաժողովի անդամ Վարդան Պողոսյանը նախ հարկ համարեց ընդգծել, որ ԱԺ-ին ներկայացված է ոչ թե նոր Սահմանադրության, այլ սահմանադրական փոփոխությունների նախագիծ, քանի որ գործող Սահմանադրության առաջին և երկրորդ հոդվածները փոփոխության ենթակա չեն. դրանք կարող են փոփոխվել միմիայն նոր Սահմանադրություն ընդունելու պարագայում:

«Այդ հոդվածները Հայաստանը հռչակում են ինքնիշխան, ժողովրդավարական, իրավական ու սոցիալական պետություն, մնացածը գալիս է լրացնելու այդ հոդվածները` ամրագրելով անհատի դիրքն այդ պետությունում, ամրագրելով պետություն-անհատ հարաբերությունները»,- ասաց նա: