Սահմանամերձ 31 համայնքների առաջին կուրսեցիների ուսման վարձը կզեղչեն 10 տոկոսով

Սահմանամերձ 31 համայնքների բոլոր այն ուսանողները, որոնք առաջին կուրս են հաճախելու, կօգտվեն երկու առավելությունից` ուսման վարձի 10 տոկոս զեղչից և վարձը վճարելու անհատական գրաֆիկից: Այսօր լրագրողներին հայտնեց ՀՀ ԿԳ նախարար Արմեն Աշոտյանը:

Նա տեղեկացրեց նաև, որ արտոնություններից կարող են օգտվել բացառապես կառավարության որոշմամբ «առանձնացված» 31 համայնքների այն ուսանողները, որոնք դպրոցն ավարտել են տվյալ գյուղում:

Նախարարը տեղեկացրեց նաև, որ այն ուսանողները, որոնք առաջին կուրսում կհաղթահարեն ՄՈԳ-ը, երկրորդ կուրսում նրանց ուսման վարձը կզեղչվի 20 տոկոսով: «Այս պահին մեզ դիմել է արդեն 140 ուսանող»,- ասաց նախարարը:

Ի դեպ, նա նշեց նաև, որ սահմանամերձ համայնքների դպրոցներին էլ կտրամադրվեն լրացուցիչ կահույք և համակարգիչներ: