Գյումրու նախկին քաղաքապետին պատկանող ընկերության լիազորությունները դադարեցվել են. «Ժամանակ»

«Ժամանակ» թերթը գրում է. «Երեկ առավոտից խնդրահարույց իրավիճակ էր ստեղծվել Գյումրիի ներքաղաքային ուղեւորատար տրանսպորտի ոլորտում: Դադարեցվել էին թիվ 22 երթուղին սպասարկող «Սրընթաց ուղիներ» ՍՊԸ լիազորությունները: Այս առնչությամբ փորձեցինք պարզաբանումներ ստանալ Գյումրիի քաղաքապետարանից: Ի զարմանս մեզ՝ բացակայում էր համապատասխան բաժնի ղեկավարը, եւ պարզաբանումներ մեզ փոխանցեց քաղաքապետի մամուլի խոսնակ Լիլիթ Մակարյանը:

Ըստ այդմ՝ դեռեւս 2014 թ. մայիսին սպասարկող ընկերությունը խախտումներ է թույլ տվել մրցույթով իրեն վստահված երթուղու սպասարկման ընթացքում, ինչի համար Գյումրու քաղաքապետարանը դիմել է դատարան: Առաջին ատյանի դատարանը բավարարել է քաղաքապետարանի հայցը, սակայն սպասարկող ընկերությունը դիմել է Վերաքննիչ դատարան՝ առաջին ատյանի ընդհանուր իրավասության դատարանի վճռի բեկանման հայցով: Վերաքննիչ դատարանը անփոփոխ է թողել առաջին ատյանի դատարանի վճիռը, իսկ արդեն Վճռաբեկ դատարանն էլ նույնիսկ վարույթ չի ընդունել «Սրընթաց ուղիների» հայցը Վճռաբեկ ատյանին:

Նշենք, որ քաղաքի ամենից ծանրաբեռնված երթուղիներից մեկն է թիվ 22-ը, որը ըստ քաղաքում շրջանառվող լուրերի, պատկանում է նախկին քաղաքապետ Վարդան Ղուկասյանի ընտանիքին»:

Առավել մանրամասն՝ թերթի այսօրվա համարում